Am Samstig em 16. September isch de Willy Wonka die ganzi Pfadi Friese go bsueche cho. Er hät ois verzellt, dass d’Oompa Loompas de Schlüssel zu sinere Fabrik klaut hend, will sie nümm wennd Süessigkeite herstelle sondern nurno Spargle(wää). Und als wär das nöd scho schlimm gnueg, het er au no sini 5 Bsuecher*inne entfüehrt. Mir hend ihm aber natürlich welle helfe, zum das verhindere und d’Chinde wieder finde.
Mir hend ois ih 5 Gruppe ufteilt zum e besseri Chance ha zum d’Chind wieder finde. Will sie alli zeme wüssed wo de Schlüssel und d’Oompa Loompas sind. Mir hend imene grosse Kampf de Schlüssel chöne zruggerobere und hend d’Oompa Loompas gfrögt warum sie kei Süessigkeite meh wennd herstelle. Sie hend ois denn verzellt, dass sie au nöd gern Spargle hend und nur hend welle geg ihri schlechte Arbeitsbedingigunge vorgah. Zum das stoppe verlanget d’Oompa Loompas, dass de Willy en Vertrag für besseri Arbeitsbedingige unterschriibt. Er het zuegstumme und unterschriebe und zur Feier des Tages het er ois no zumene grosse Festmahl ihglade.
