Mova
Mir sind vo de Bewohner*inne vom Kontinent Eniti iiglade worde. Sie bruched oisi Hilf, will ihre Kontinent isch usenandbroche und d Tierwelt isch au nüm ganz intakt. Natürli hend sich oisi muetige und gwundrige Wölfli sofort dezue parat erchlärt.
So ischs dezuecho, dass mir am Sunntig alli zeme is Bu-La greist sind. Wo mir mit em Zug am Lagerplatz verbi gfahre sind, hemmer mit Stuune nüme chöne ufhöre, es wahnsinnig beidruckends Bild, wenn sich 35‘000 Lüt uf eim riesige Zeltplatz tummlet.
Aacho bi oisem Lagerplatz, hend ois die vier Tiergurus begrüesst. Im Lauf vo de nächste Täg hemmer die Gurus immer besser kenneglernt, sie hend ois sogar mal zunere Eröffnigsfiir inklusive 1. Augustfiir iiglade. Det ischs ganze Bula vor ere grosse Bühni zemecho, es het es Theater ge, es paar Redene, Falschirmspringendi und uu vill Musig. Sogar d Band Hecht isch cho und mir hend alli ganz vill tanzt und sind denn todmüed is Bett gheit.
Irgendwenn isch ois aber ufgfalle, dass die Tiergurus gar nöd so lieb sind, wies tünd, irgendwie sinds scho fast chli Tierliquäler*inne.
Uf de Wanderig hemmer denn au mit em Geier gredet und usegfunde, dass ihm all sini Eier vo de Gurus gchlaut werdet. Mir hend en Plan gschmiedet zum d Gurus überliste und am Schluss ischs ois glunge, zum alli Kontinent z vereine und d Gurus z vertriibe.
Als Pendant zu de Eröffnigsfiir hets natürli au e Abschlussfiir geh, wo mir alli zeme mit em Bligg und 77 Bombaystreet Vollgas geh hend. S Mova het ois zum Abschied no e wunderschöni Liecht- und Drohneshow gschenkt, wo de meiste glaub sobald nüm usem Chopf wird ga. Begleitet dur s ganze Bula het ois de Mova-Song, alli vier Landessprache sind gmischlet i dem Song und mir hend sogar de Tanz dezue glernt - Mova, on y va!
